admin
ધરમપુર તાલુકા પંચાયતના તાલુકા વિકાસ અધિકારી (TDO) તરીકે ધીરુભાઈ એમ. પટેલે વિધિવત રીતે પદભાર સંભાળ્યો છે. અગાઉના TDO કૃષ્ણપાલ મકવાણાની બદલી તેમજ બઢતી થતાં તેમના સ્થાને ધીરુભાઈ પટેલની નિમણૂક કરવામાં આવી છે. નવા TDOના આગમનથી તાલુકાના વહીવટી તંત્ર અને વિકાસલક્ષી કામગીરીમાં નવી ગતિ આવવાની આશા વ્યક્ત કરવામાં આવી રહી છે.
પદભાર સંભાળ્યા બાદ ધીરુભાઈ પટેલને શુભેચ્છા પાઠવવા માટે તાલુકાના વિવિધ સામાજિક અને રાજકીય આગેવાનો તેમજ અગ્રણીઓએ રૂબરૂ મુલાકાત લીધી હતી. આગેવાનોએ ફૂલોના ગુલદસ્તા અર્પણ કરી તથા મીઠાઈ ખવડાવી તેમનું ઉષ્માભર્યું સ્વાગત કર્યું હતું અને નવી જવાબદારી માટે શુભકામનાઓ પાઠવી હતી.
આ શુભેચ્છા મુલાકાત દરમિયાન ધરમપુર તાલુકા પંચાયતના પ્રમુખ, તાલુકા વિરોધ પક્ષના નેતા સહિત વિવિધ આગેવાનો ઉપસ્થિત રહ્યા હતા. આગેવાનોએ ધીરુભાઈ પટેલના વહીવટી અનુભવ અને કુનેહની પ્રશંસા કરી હતી.
આ પ્રસંગે આગેવાનોએ આશા વ્યક્ત કરી હતી કે નવા તાલુકા વિકાસ અધિકારીના માર્ગદર્શન હેઠળ તાલુકા પંચાયતની કામગીરીમાં વધુ ગતિશીલતા, પારદર્શિતા અને અસરકારકતા આવશે. ખાસ કરીને ગ્રામ્ય વિસ્તારોમાં વિકાસના કામો, સરકારી યોજનાઓનો લાભ લાભાર્થીઓ સુધી પહોંચાડવા, પ્રાથમિક સુવિધાઓ તથા જનહિતના પ્રશ્નોના નિરાકરણમાં વહીવટી તંત્ર વધુ સક્રિય બનશે તેવી અપેક્ષા વ્યક્ત કરવામાં આવી હતી.
ધીરુભાઈ પટેલે પણ નવી જવાબદારીને નિષ્ઠાપૂર્વક નિભાવવાની સાથે તાલુકાના વિકાસ કાર્યોને પ્રાથમિકતા આપવાની દિશામાં કામગીરી કરવાની પ્રતિબદ્ધતા વ્યક્ત કરી હતી.
