દાદરા નગર હવેલીમાં શિક્ષણનો ઉત્સવ: પ્રશાસક પ્રફુલ્લ પટેલના હસ્તે આંબોલી ગામેથી ‘શાળા પ્રવેશોત્સવ-૨૦૨૬’ નો પ્રારંભ થશે

દાદરા નગર હવેલીમાં શિક્ષણનો ઉત્સવ: પ્રશાસક પ્રફુલ્લ પટેલના હસ્તે આંબોલી ગામેથી ‘શાળા પ્રવેશોત્સવ-૨૦૨૬’ નો પ્રારંભ થશે
સેલવાસ:

કેન્દ્રશાસિત પ્રદેશ દાદરા નગર હવેલી, દમણ-દીવ અને લક્ષદ્વીપના પ્રશાસક શ્રી પ્રફુલ્લ પટેલના માર્ગદર્શન હેઠળ શિક્ષણ વિભાગ દ્વારા આગામી ૧૪ જૂન, ૨૦૨૬ ના રોજ ભવ્ય ‘શાળા પ્રવેશોત્સવ-૨૦૨૬’ નું આયોજન કરવામાં આવ્યું છે. આ શૈક્ષણિક ઉત્સવનો મુખ્ય કાર્યક્રમ દાદરા નગર હવેલીના આંબોલી ગામે આવેલી સરકારી પ્રાથમિક શાળા (Govt. Primary School, Amboli, DNH) ખાતે યોજાશે.

પ્રશાસક પ્રફુલ્લ પટેલ ભૂલકાંઓને કરાવશે શાળા પ્રવેશ
આંબોલી ગામના મુખ્ય કાર્યક્રમમાં પ્રદેશના માનનીય પ્રશાસક શ્રી પ્રફુલ્લ પટેલ મુખ્ય મહેમાન તરીકે ઉપસ્થિત રહેશે. તેઓ પોતાના વરદહસ્તે નાના-નાના ભૂલકાંઓને કુમકુમ તિલક કરી, મોં મીઠું કરાવીને શાળામાં ઉત્સાહભેર પ્રવેશ કરાવશે અને તેમને શૈક્ષણિક કીટનું વિતરણ પણ કરશે.

​૨૬ પંચાયતોની ૮૦ શાળાઓમાં એકસાથે ગૂંજશે પ્રવેશોત્સવનો નાદ
​આ પ્રવેશોત્સવ માત્ર એક શાળા પૂરતો મર્યાદિત ન રહેતાં સમગ્ર પ્રદેશમાં એક જન-આંદોલનનું સ્વરૂપ લેશે. પ્રદેશની ૨૬ પંચાયતોમાં આવેલી અંદાજે ૮૦ જેટલી શાળાઓમાં એક જ દિવસે અને એક જ સમયે આ પ્રવેશોત્સવ કાર્યક્રમ ધામધૂમથી ઊજવવામાં આવશે. આ વ્યાપક અભિયાનનો મુખ્ય ઉદ્દેશ્ય પ્રદેશના તમામ બાળકો સુધી ગુણવત્તાયુક્ત શિક્ષણ પહોંચાડવાનો અને શાળાઓમાં ૧૦૦% નામાંકન સુનિશ્ચિત કરવાનો છે.

​સમગ્ર શિક્ષા અભિયાન હેઠળ આયોજન:

ભારત સરકારના ‘રાઈટ ટુ એજ્યુકેશન’ (RTE) અને ‘સમગ્ર શિક્ષા’ (Samagra Shiksha) ના સૂત્ર “Education for All” (સૌને શિક્ષણ, સમાન શિક્ષણ) ને સાર્થક કરવા માટે વહીવટી તંત્ર દ્વારા તમામ તૈયારીઓ પૂર્ણ કરી લેવામાં આવી છે.

​આ કાર્યક્રમમાં સ્થાનિક લોકપ્રતિનિધિઓ, શિક્ષણ વિભાગના ઉચ્ચ અધિકારીઓ, શિક્ષકો અને મોટી સંખ્યામાં વાલીઓ ઉપસ્થિત રહીને બાળકોના ઉજ્જવળ ભવિષ્યના આ પ્રારંભને વધાવશે.